Su primu de su mesi’e Gennàrgiu de su 2021,
A IS PÓPULUS DE SU MUNDU:
A IS PERSONIS CHI GHERRANT ME IS CINCU CONTINENTIS:
FRADIS, SORRIS E CUMPÀNGI@s
Me is mesis passaus nosi seus inténdius apari in maneras diferentis. Seus féminas, lésbicas, gays, bisessualis, transgèneris, trabistius, transessualis, intersessualis, queer e de prus meda puru, óminis, trumas, coletívus, assótzius, organizatzionis, movimentus sotzialis, pópulus primàrgius, assótzius de bixinau, comunidadis e unu longu eccetera chi nosi donat identidadi.
Nosi diferentziant e nosi istésiant terras, celus, montis, baddis, stepas, padentis, desertus, océanus, lagus, arrius, arritzolus, lagunas, arratzas, curturas, línguas, stórias, edadis, giografias, identidadis sessualis e no, arréxinis, làcanas, maneras de s’organizai, crassis sotzialis, poderi de comporai, prestígiu sotziali, fama, popularidadi, sighidoris, likes, munedas, gradu de scolarisadura, maneras de essi, artis, virtudis, difetus, pro(s), contras, perou(s), epuru(s), trivas de pari, disamistadis, cuncessionis, chistionis, contra chistionis, debbatas, abbétias, denúncias, acusas, minisprétzius, fobias, filias, bàntidus, arrefudus, súrbius, tzacarramanus, divinidadis, dimónius, dogmas, sciollórius, disigius, disgustus, maneras, e unu longu eccetera chi nosi fait diferentis e fatuvatu, a s’imbressi.
Pagu cosa sceti nosi acàpiat apari:
Ca si pigaus a coru is doloris de sa terra: sa violentzia contras de is féminas, s’acanarxadura e su minisprétziu de is diferétis po is identidadis afetivas, sentimentalis, sessualis insoru; su degollu de sa pipiesa, s’ocidroxu de is pópulus primàrgius, s’arratzismu, su militarismu, su sfrutamentu, su sdorrobbu; sa sciusciadura de sa naturalesa.
Sa cuscièntzia chi est unu sistema s’arresponsabbili de custus doloris. Su boginu est unu sistema sfrutadori, patriarcali, piramidali, arratzista, furoni e criminali: su capitalismu.
Su sciri chi no fait a reformai custu sistema, no fait a dhu educai, smenguai, limai, amasedai, umanizai.
S’impignu a gherrai, aundisisiat e in calisisiat ora – donniun@ in su logu suu- contras de custu sistema fintzas a ddu sciusciai totu. Sa subravvivèntzia de s’umanidadi dipendit de su sciusciu de su capitalismu. No s’arrendeus, no si bendeus e no atzopiaus.
Sa siguresa chi sa gherra po s’umanidadi est mundiali. Aicetotu comenti su sciusciu chi avantzat no connoscit làcanas, natzionalidis, pandelas, línguas, curturas, arratzas; aicetotu sa gherra po s’umanidadi est aundisisiat, sèmpiri.
Su cumbincimentu chi funt medas is mundus chi bivint e gherrant in su mundu. E chi totu is pretesas de uniformidadi e de egemonia meletzant s’essentzia de is èsseris umanus: sa libbertadi. S’uguagliantza de s’umanidadi bivit in s’arrespetu de sa diferéntzia. In sa diversidadi sua bivit s’assimbillantza sua.
Sa cuscièntzia chi no est sa pretesa de imponni sa mirada nosta, is passus nostus, is cumpangias nostas, is caminus nostus e is sortis nostas, chi nosi at a pirmiti de avantzai, ma s’ascurtu e sa mirada de s’atru chi, diferenti e distintu tenit sa matessi bocatzioni de libbertadi e de giustesa.
Po custas coincidéntzias, e chena’e scabudai a solus is cumbincimentus nostus o lassai de essi su chi seus, eus cuncurdau de:
Primu:- Realizai atóbius, chistionus, cuncàmbias de bideas, speriéntzias, anàlisi e apretziamentus intru de is chi si seus impignaus, de bisuras diversas e terrenus diferentis, in sa gherra po sa vida. Agoa, donniun@ incapas at a sighiri su mori suu. Capassu chi a mirai e a ascurtai a s’atru nosi at a agiudai me is passus nostus. Perou su de connosci a chini est diferenti, est parti de sa gherra nosta etotu, de s’impignu nostu, de s’umanidadi nosta.
Segundu,- Chi custus atóbius e atividadis s’ant a realizai me is cincu continentis. Chi in su chi pertocat su continenti europeu, s’ant a organizai me is mesis de Argiolas, Austu, Cabudanni e Donniasanti de s’annu 2021, cun sa participatzioni dereta de una delegatzioni messicana fata de su CNI-CIG, su Frente de Pueblos en Defensa del Agua y de la Tierra de Morelos, Puebla y Tlaxcala, e s’EZLN. E in dis benidoras chi eus a nai prus ainnantis, apportai po su chi fait, ca si organizint in Àsia, Àfrica, Oceània e América.
Su de tres – Cumbidai a is chi cumpratzint is própius pentzamentus e gherras simbillantis, a totu is personis onestas e a totu is de abàsciu chi si arrebbellant e arresistint me is medas arrenconis de su mundu, po chi si agreghint, contribuint, agiudint e partitzipint a custus atóbius e atividadis, e chi firmint e fatzant insoru custa decrarada PO SA VIDA.
De unu de is pontis de dignidadi chi aunint is cincu continentis.
Nosu.
Praneta Terra,
1 de su mesi de Gennàrgiu de su 2021
De diversus, disparíngius, diferentis, dissimbillantis, disagualis, distantis e distintus arrenconis de su mundu (in arti, scéntzia e gherra in resisténtzia e rebeldìa)
